ئاستی ئاوی بەنداوی دەربەندیخان مەتر و نیوێك و دوکان 70 سم زیادیانكردوە

20:53 2025-12-10 43598 كوردستان 0

2025-12-10

43598

وەزارەتی کشتوکاڵ و سەرچاوەکانی ئاو ڕایگەیاند، لە هەردو بەنداوی دوکان و دەربەندیخان، زیاتر لە 100 سەد ملیۆن مەتر سێجا داهاتی ئاو خەزن کراوە. لە بەنداوی دەربەندیخان مەترێك و نیوێكك و دوکان 70 سم زیادیانکردوە، ئەوەش دوای ئەو شەپۆلەی بارانبارین كە لە سێ ڕۆژی ڕابردودا ناوچەكانی هەرێمی كوردستانی گرتوە، لە چەمچەمال و لەیلان زیانی گیانی لێكەوتەوە.

وەزارەتی کشتوکاڵ و سەرچاوەکانی ئاوی حكومەتی هەرێم، ئەمڕۆ چوارشەممە لە ڕاگەیەندراویكدا بڵاویكردەوە، لە هەرێمی کوردستان بەنداوەکان دەستیان بە خەزنکرد بەکاریگەری دواین شەپۆلی باران و لافاو لە ماوەی دو ڕۆژی رابردو، هەردو بەنداوی دوکان و دەربەندیخان، زیاتر لە 100 سەد ملیۆن مەتر سێجا داهاتی ئاو خەزن کراوە.

ئاماژەی بەوەشكرد، ئاستی ئاو لە بەنداوی دەربەندیخان مەترێك و نیوێك، لە دوکانیش 70 سم زیادیانکردوە، بەنداوە بچوکەکانیش لە سنوری گەرمیان و سلێمانی هەمویان پڕبون لە سنوری هەولێر یەک بەنداو پڕبوە و سەرڕێژی بوە، ئەوانیتریش ئاویان لێ خەزنکراوە، لە سنوری دهۆکیش ئاوی بەنداوەکان زیادیان کردوە بەڵام بە ڕێژەی کەمتر. هەروەها کاریگەری شەپۆلەکە ڕۆژانی داهاتووش بۆ زیادکردنی ئاوی بەنداوە گەورەکان بەردەوامە.

لایخۆیەوە به‌ڕێوه‌به‌رایه‌تی كه‌شناسی و بومه‌له‌رزه‌زانی هه‌رێمی كوردستان ئەمڕۆ لە ڕاگەیەندراوێكدا بڵاویكردەوە، کەشی ئەمڕۆی ناوچەکەمان بە گشتی ئاسمان هەور و هەندێ کات نیمچە هەور دەبێت و کاریگەری ئەو شەپۆلی بارانبارینەی ڕوی لە ناوچەکە کردبو بەرەو کۆتای دەچێت، هەروەها سبەی ئاسمان نیمچە هەور دەبێت و بەگشتی کەشەکە تا ڕادەیەک جێگیر دەبێتەوە.

له‌ ڕۆژی دوشه‌ممه‌وه‌ شه‌پۆلێكی بارانبارین هه‌رێمی كوردستانی گرتەوە و له‌ پاشنیوه‌ڕۆی دوێنێ سێشەممەوە لافاو له‌ چه‌ند ناوچه‌یه‌ك دروستبوه‌ و به‌هۆیه‌وه‌ ده‌یان ئۆتۆمبێل له‌ چه‌مچه‌ماڵ ژێرئاوكه‌وتون و دو كه‌سیش گیانیان له‌ده‌ستداوه‌ و ژمارەیەكی دیكەش برینداربون. ئەوە جگەی لە گیان لەدەستدانی منداڵێكی دیكە لە لەیلانی سەر بە پارێزگای كەركوك.