ئەنجومەنی سەرتاسەریی مامۆستایان و فەرمانبەرانی ناڕازی هەرێم داوا لە نوێنەرانی كورد لە بەغدا دەكات كە دەنگیان بگەیەنن بە حکومەت و پەرلەمانی عێراق و هەوڵی چارەسەری گرفتەکانی موچەخۆرانی هەرێم بدەن و موچەی موچەخۆران دوربخرێتەوە لە ململانی سیاسیەکان و بڕیارەکانی دادگای فیدڕاڵی جێبەجێ بکرێن.

ئەنجومەنی مامۆستایان و فەرمانبەرانی ناڕازی ئەمڕۆ چوارشەممە لە ڕاگەیەندراوێكدا بڵاویكردەوە، موچەخۆرانی هەرێمی کوردستان بەهۆی بڕیاری هەڵە و سیاسیەتی هەڵەی دەسەڵاتدارانی هەرێم زیاتر لە 10 ساڵە لە دۆخێکی دارایی و ئابوریی سەختدا دەژین. چونکە لەو ماوەیەدا بە ڕاگرتنی پلەبەرزکردنەوەوە نزیکەی 60 موچەیان فەوتاوە.

ئاماژەی بەوەشكرد، دوای دەرچونی بڕیاری دادگای فیدڕاڵی و ڕێکكەوتنی نەوتی نێوان هەرێم و بەغدا ئومێدێک هەبو کێشەکان چارەسەربن و جارێکی تر موچەکانمان دوانەکەوێت و نەفەوتێن. بەڵام بەداخەوە دوای ئەو ماوە دورودرێژە، کێشەکان نەک چارەسەرنەبون بەڵکو قوڵتربونەتەوە، ژیان و بژێوی موچەخۆران له نێوان بەرداشی هەرێم و بەغدا دا خەرێکە دەهاڕدرێت و ساڵ دوای ساڵ موچەی زیاتریان دەفەوتێت و دابەشکردنی موچە زیاتر دوادەکەوێت.

بەگوێرەی ڕاگەیەندراوكە، لە ئێستادا کە ئەم پەیامەتان ئاراستە دەکەین چارەنوسی موچەی مانگەکانی 11 و 12ی ساڵی ڕابردوی مامۆستایان و فەرمانبەران دیار نییە و موچەی مانگی یەکی ساڵی 2024ی دابەشنەکراوە. ئێمە لە ئەنجومەنی سەرتاسەری مامۆستایان و فەرمانبەرانی ناڕازی داواکارین لە ئێوەی نوێنەرانی کورد لە پەرلەمانی عێراق پرسی موچەی موچەخۆران خەمی یەکەم و کاری لە پێشینەتان بێت و بەدواداچونی جدی بکەن بۆ داواکاری و کێشەکانی مووچەخۆرانی هەرێمی کورستان.

ئەوەشیخستەڕو، داواکارین ئێوەی نوێنەرانمان وەک هەمیشە دەنگمان بگەیەنن بە حکومەت و پەرلەمانی عێراق و لە هەوڵی چارەسەری گرفتەکانی موچەخۆرانی هەرێمدا بدەن، بۆ ئەوەی حکومەت و پەرلەمانی عێراق بە ئەرکە یاسایی و دەستورییەکانی خۆیان بەرامبەر موچەخۆرانی هەرێم جێبەجێ بکەن و موچەی موچەخۆران دوربخرێتەوە لە ململانی سیاسیەکان و بڕیارەکانی دادگای فیدڕاڵی جێبەجێ بکرێن و ئێمەی مامۆستایان و فەرمانبەرانی هەرێم نەبین بە بە قوربانی کێشە سیاسی و گەندەڵیەکانی هەرێم و بەغدا.

بەگوێرەی ڕاگەیەندراوەكە، لە ئێستا گرنگترین داواکارییەکانی مامۆستایان و فەرمانبەرانی ناڕازی بریتین لە:

1- بەزوترین کات چارەنوسی موچەی مانگی 11 و 12ـی ساڵی ڕابردو و مانگی یەکی ئەمساڵ یەکلایی بکرێنەوە و دابەشبکرێن.

2- ئێمە لە سەرەتاوە پڕۆژەی (هەژماری من)ـمان ڕەتکردوەتەوە، لە ئێستاشدا وەزارەتی دارایی هەرێم بڕیاریداوە موچەی ئەو موچەخۆرانە ڕابگرێت کە هەژماری من یان پڕنەکردوەتەوە، بۆیە داواکارین لە بەغداوە ڕێگری لەوە بکەن کە موچەی هیچ موچەخۆرێک ڕابگیرێت.

3- هەوڵبدەن بۆ ئەوەی مامۆستایان و فەرمانبەران بتوانن لە بانکە فیدڕاڵییەکان هەژمار بکەنەوە و لەو ڕێکەیەوە مووچەکانیان تەوتین بکرێت.

4- کاری جدی بکەن بۆ ئەوەی لە پڕۆژەی یاسای بودجەی ساڵی 202ـدا بڕێک پارەی پێویست تەرخان بکرێت بۆ گێرانەوەی موچە بەناو پاشەکەوتکراوەکان و ئەو موچە و بڕە پارانەی بەهەر ناوێکەوە لە موچەکانمان بڕاون.

5- دەستپێکردنەوەی پلەبەرزکردنەوەی موچەخۆرانی هەرێم، هەروەها ئەو موچەخۆرانەش کە خانەنشین دەکرێن، بەو پلەیەی کە شایستەی دەبون خانەنشین بکرێن.

6- بە هەمیشەییکردنی مامۆستایان و فەرمانبەرانی گرێبەست.

ئەوە لەكاتێكدایە كە لە ساڵی 2015 قەیرانی موچە و دابەشنەكردنی ڕوی لە هەرێمی كوردستان كردوە و  لەكۆی 132 موچەی 11 ساڵی ڕابردو، 70 موچەی تەواو دابەشكراوە، لەبەرامبەردا 44 موچە بە چارەک و لێبڕینەوە دراوە و 18 موچەش هەر دابەشنەكراوە. ئەوە جگە لە ڕاگرتنی بەرزە موچە و شایستە داراییەكانی دیكەی فەرمانبەران و موچەخۆران.