حسێن جەختیکردەوە عێراق توانای هەیە ڕۆڵێکی ئەرێنی و بنیاتنەر بگێڕێت لە سەقامگیری ناوچەکەدا

23:25 2026-01-18 37479 عێراق 0

2026-01-18

37479

ئەمڕۆ یەکشەممە"فوئاد حسێن"جێگری سەرۆکی ئەنجومەنی وەزیران و وەزیری دەرەوە،جەختی کردەوە کە عێراق خاوەنی توانایە بۆ گێڕانی ڕۆڵێکی ئەرێنی و بنیاتنەر لە پشتگیریکردنی سەقامگیری ناوچەکە و بەهێزکردنی ئاسایشی ناوچەیی.
‏وەزارەتی دەرەوە لە راگەیەندراوێکدا بڵاویکردەوە : "فوئاد حسێن"جێگری سەرۆکی ئەنجومەنی وەزیران و وەزیری دەرەوە،لە چوارچێوەی سەردانە فەرمییەکەیدا بۆ تاران-ی پایتەختی ئێران، لەگەڵ “عەلی لاریجانی"سکرتێری ئەنجومەنی باڵای ئاسایشی نیشتمانیی ئێران کۆبووەوە.
‏وەک راگەیەندراوەکە ئاماژەی پێداوە: لە میانی دیدارەکەدا، باس لە پرسە ئەمنییەکان کرا کە کاریگەری ڕاستەوخۆیان لەسەر ئاسایش و سەقامگیری ناوچەکە هەیە، هەروەها تاوتوێی ڕێگاکانی بەهێزکردنی هەماهەنگی و هاوکاری کرا بۆ ڕووبەڕووبوونەوەی تەحەدییە ئەمنییە هاوبەشەکان بە شێوەیەک کە یارمەتیدەر بێت لە چەسپاندنی سەقامگیری ناوچەیی.
‏لە بەشێکی تری راگەیەندراوەکەدا هاتووە: وەزیری دەرەوە گوێی لەو بۆچونانە گرت، کە لەلایەن لاریجانییەوە،تێیدا تیشکی خستە سەر دیارترین ئەو ڕووداوانەی کۆماری ئیسلامی ئێران لە ماوەی ڕابردوودا بەخۆیەوە بینیویەتی، لەگەڵ پەرەسەندنی بارودۆخی ناوخۆیی وڵاتەکەی.
‏بە گوێرەی راگەیەندراوەکە : "فوئاد حسێن" باسی لە ڕێڕەوی سیاسی لە عێراق کرد، بە تایبەت ئەو هەوڵانەی بۆ پێکهێنانی حکومەتی نوێ دەدرێن،جەختیشی کردەوە لەسەر پێویستی پابەندبوون بە وادە دەستوورییەکان و هەڵبژاردنی حکومەتێک کە بتوانێت بە شێوەیەکی ئەرێنی لەگەڵ ژینگەی ناوچەیی و نێودەوڵەتیدا کارلێک بکات، بۆ ڕووبەڕووبوونەوەی تەحەدییە ئابووری و داراییەکان.
‏هەر بەگوێرەی ڕاگەیەندراوەکە "فوئاد حسێن " لەبارەی تەحەدییە ئابوورییە هاوشێوەکان کە ڕووبەڕووی وڵاتانی ناوچەکە دەبنەوە، لەوانەش عێراق و ئێران"جەختی کردەوە کە مامەڵەکردنی کاریگەر لەگەڵ ئەم تەحەدییانە پێویستی بە بەدیهێنانی ئاستێکی بەرزتر لە سەقامگیری ناوچەیی هەیە، لەگەڵ چەسپاندنی سەقامگیری سیاسی، بۆ ئەوەی یارمەتیدەر بێت لە چارەسەرکردنی کێشە ئابوورییەکان و بەهێزکردنی دەرفەتەکانی گەشەپێدان.
‏وەزیری دەرەوە دووپاتیشیکردەوە : کە عێراق خاوەنی توانایە بۆ گێڕانی ڕۆڵێکی ئەرێنی و بنیاتنەر لە پشتگیریکردنی سەقامگیری ناوچەکە و بەهێزکردنی ئاسایشی ناوچەیی.