ئەمڕۆ چوارشەممە، سەرکردە سیاسییەکان و وەزیران بەبۆنەی هەشتەمین ساڵیادی سەرکەوتن بەسەر چەتەکانی تیرۆریستی داعشدا، پیرۆزباییان لە گەلی عێراق کرد.
لەلای خۆیەوە، سەید عەمار حەکیم، سەرۆکی ڕەوتی حیکمەی نیشتمانی، لە ڕۆژی سەرکەوتندا و لە بەیاننامەیەکدا كە بۆ ئاژانسی هەواڵی موتەڵع ناردووە، دەڵێت: لەم ڕۆژەدا، ڕۆژی سەرکەوتنی عێراق، بەرزترین سڵاو ئاراستەی خاوەنی فەتوا پیرۆزەکە و ئەوانەی بەدەم بانگەوازەکەوە چوون، هەروەها سەرجەم شەهیدانی عێراق دەکەم، ئەوانەی خاک و کەرامەت و پیرۆزییەکانیان پاراست.

هاوکات، شێخ قەیس خەزعەلی، ئەمینداری گشتیی عەسائیبی ئەهلی حەق ڕایگەیاند: بەبۆنەی هاتنەوەی ساڵیادی جەژنی سەرکەوتنی یەکجاری بەسەر گرووپە تەکفیرییەکانی داعش و ئازادکردنی خاکی پاکی عێراق لە پیسی و گڵاو‌ی ئەوان لە داستانێکی قارەمانانەی نەمردا، جوانترین پیرۆزبایی ئاراستەی مەقامى مەرجەعییەتی ئایینی پیرۆز، و خێزانی شەهیدە نەمرەکانمان و بریندارە پاڵەوانەکانمان، و موجاهیدە دلێرەکانمان دەکەین کە گیان و ماڵی خۆیان لەپێناو بەرگریکردن لە نیشتمان و پیرۆزییەکان بەخشی.

لەلایەکی دیکەوە، ئەحمەد ئەسەدی وەزیری کار لە ساڵیادی ڕۆژی سەرکەوتنی مەزن بەسەر چەتەکانی تیرۆریستی داعش، لە بەیاننامەیەکدا کە بۆ ئاژانسی هەواڵی موتەڵع ناردووە، جەختی کردەوە: بە شانازی و شکۆوە ئەو داستانە نەمرە وەبیر دەهێنینەوە کە ڕۆڵەکانی عێراق بە قارەمانێتی و قوربانیدانیان تۆماریان کرد و لاپەڕەیەکی پرشنگداریان لە مێژووی نیشتماندا نووسیەوە.

وتیشی: پیاوانی هێزە ئەمنییەکانمان و حەشدی شەعبی بەرزترین وێنەی باوەڕبوون بە نیشتمانیان پێشکەش کرد و وەک بەربەستێکی قایم لە بەردەم هێزەکانی تاریکیدا وەستانەوە، تا ئەو سەرکەوتنە یەکجارییە بەدی هات کە خاک و کەرامەتی عێراقی پاراست.

لەلای خۆیەوە، عەبدولکەریم بەسری سەرۆکی دەزگای ئاسایشی نیشتمانی لە بەیاننامەیەکدا کە بۆ ئاژانسی هەواڵی موتەڵع ناردووە، دەڵێت: ڕۆژی سەرکەوتن بەسەر باندە تیرۆریستییەکاندا، وێستگەیەکی نیشتمانیی نەمرە لە یادەوەریی عێراقییەکاندا، و سەرکەوتنێکە کە ڕۆڵەکانی هێزە ئەمنییەکان بە هەموو جۆرەکانیانەوە دروستیان کردووە، لە پێش هەمووشیانەوە دەزگا هەواڵگرییەکان کە کارێکی جۆرییان لە بەدواداچوونی ورد و چاودێری و شیکردنەوەدا پێشکەش کرد و بەشدارییان کرد لە پووچەڵکردنەوەی سەدان پیلانی تیرۆریستی و پاراستنی شارەکان و هاووڵاتیان.

ئاماژەی بەوەشکرد: دەزگای ئاسایشی نیشتمانی بەردەوامە لە چەسپاندنی ڕێبازەکەی کە بریتییە لە کارکردنی پێشوەختە و بەهێزکردنی تواناکانی لە ڕووی تەکنیکی و مەیدانییەوە بۆ ڕووبەڕووبوونەوەی هەڕەشەکان بە هەموو شێوەکانیانەوە، بە جۆرێک کە پاراستنی ئاسایش و سەقامگیری مسۆگەر بکات و یەکێتیی وڵات بپارێزێت و ڕێگە لە گەڕانەوەی تیرۆر بگرێت.