سەرۆك وەزیران و سەرۆك كۆمار دۆسییەی هاوپەیمانی نێودەوڵەتی لە سەر خاكی عێراق تاوتوێ دەكەن

00:18 2024-02-15 41364 عێراق 0

2024-02-15

41364

سەرۆكی ئەنجومەنی وەزیران محەمەد شیاع سودانی، لەگەڵ سەرۆك كۆمار عەبدوللەتیف جەمال رەشید، گفتووگۆیان كرد لەبارەی بوونی هاوپەیمانی نێودەوڵەتی لەسەر خاكی عێراق.
نوسینگەی راگەیاندنی سەرۆك وەزیران لە بەیاننامەیەكدا رایگەیاند: سەرۆكی ئەنجومەنی وەزیران محەمەد شیاع سودانی، لەگەڵ سەرۆك كۆمار عەبدوللەتیف جەمال رەشید، كۆبووەوە و پێكەوە باسیان لە كۆی پێشهاتە سیاسی و ئەمنی و ئابوورییەكانی عێراق و ناوچەكە كرد، جگە لە پێداچوونەوە بە كارەكانی حكومەت و هەوڵدان لە جێبەجێكردنی بەرنامەكەیدا، لەگەڵ ئەو ئەولەویەتانەی كە باری خزمەتگوزاری و ژیانی هەموو عێراقیەكان باشتر دەكەن.
ئاماژەی بەوەشكرد: لە كۆبوونەوەكەدا هەردوولا جەختیان كردەوە لەسەر پێویستی هەوڵی هاوبەش لەنێوان هەمووان، بەمەبەستی هەنگاونان بەرەو پێشەوە بۆ بەدیهێنانی شایستە دەستوورییەكان و پاراستنی سەقامگیری ئەمنی و سیاسی، و تەواوكردنی پرۆسەی بنیاتنانەوە و گەشەپێدانی ئابووری لە عێراق.
راشیگەیاند: دۆسیەی بوونی هاوپەیمانی نێودەوڵەتی لەسەر خاكی عێراق و هەروەها دەرئەنجامی ئەو كۆبوونەوانەی لە نێوان هەردوولادا لەو بارەوە ئەنجام دراون تاوتوێ كرا، و تیایدا جەختكرایەوە كە پشتیوانی لە ڕێوشوێنەكانی حكومەت بكرێت بۆ كۆتایی هێنان بە بوونی هاوپەیمانی و هەنگاونان بۆ پەیوەندییەكی دوولایەنە لەگەڵ وڵاتانی ئەندام.
بەیاننامەكە ئاماژەی بەوەشدا: لە كۆبوونەوەكەدا پەیوەندی نێوان حكومەتی فیدراڵی و حكومەتی هەرێمی كوردستان تاووتوێكرا و جەختكرایەوە لەسەر بایەخی درێژەدان بە دیدار و كۆبونەوەكان بۆ گەیشتن بە لێكتێگەیشتنەكان، كە ببنەهۆی چارەسەری ریشەیی بۆ ژمارەیەك لە دۆسێ و بابەتەكانی پەیوەست بە لایەنەكانی جێبەجێكاری و رێوشوێنیی هاوبەش لەسەر بنەمای دەستور و یاسا و بەرژەوەندی باڵای وڵات.