سەرۆك کۆمار پێشوازی لە باڵیۆزی ویلایەتە یەکگرتوەکانی ئەمریکا دەکات

15:09 2024-03-24 49262 عێراق 0

2024-03-24

49262

سەرۆك کۆمار د.لەتیف جەمال رەشید پێشوازیکرد لە ئێلینا رۆمانسکی باڵیۆزی ویلایەتە یەکگرتوەکانی ئەمریکا لە عێراق.
نوسینگەی راگەیاندنی سەرۆکایەتی کۆمار لە بەیاننامەیەکدا بڵاویکردەوە؛-لەمیانەی دیدارەکەدا، کە ئەمڕۆ یەکشەممە 24-3-2024 لە کۆشکی سەلام لە بەغداد بەڕێوەچوو، سەرۆك کۆمار جەختیکردەوە لە بەردەوامیدان بە بنیاتنانی پەیوەندییەکی بەهێز، کە خزمەت بە بەرژەوەندییە هاوبەشەکان بکات و رێز لە سەروەریی نیشتمانی بگرێت و کار بۆ پەرەپێدانی هاریکاری هاوبەش لە بوارە جیاوازەکاندا، بکات.
هەروەها ئاماژەی بەوەکرد، کە عێراق سورە لەسەر بەردەوامیدان بە پرۆسەی چاکسازی و نەهێشتنی گەندەڵی و بونیادنانی هاوبەشیی نایاب، کە بەشداری بکات لە بەدیهێنانی پەرەپێدانی گشتگیر و گەشەی ئابوری. جەختی لە بایەخی سودوەرگرتن لە شارەزایی و ئەزمونەکانیش کردەوە بۆ بەدەستهێنانی شارەزایی و باشترکردنی توانای کەرتەکانی ئابوری و بازرگانی و کشتوکاڵ و ژینگە و وزە.
هەروەك سەرۆك کۆمار ئاماژەی بەوەکرد، سەرۆکایەتی کۆمار ئازادکردنی ئەو بەندکراوانەی لەئەستۆگرتوە، کە ماوەی سزاکانیان تەواوبووە، لەم چوارچێوەیەشدا لیژنەیەک پێکهێنراوە و سەرۆکایەتی کۆمار و ئەنجومەنی باڵای دادوەری و وەزارەتەکانی داد و ناوخۆ و راوێژکاری ئاسایشی نەتەوەیی لەخۆدەگرێت بۆ بەدواداچوونی دۆسیەکانی سزادراوان و وادەی کۆتاییهاتنی سزاکانیان، تا لە کات و ساتی دیاریکراودا ئازادبکرێن.
هاوکات جەختیکردەوە لە گرنگی دۆزینەوەی چارەسەر بۆ کێشە هەڵپەسێردراوەکانی نێوان حکومەتی فیدراڵی و هەرێمی کوردستان بەگوێرەی دەستور و یاسا و لێکتێگەیشتنە سیاسییەکان. ئاماژەی بە خواستی هەردوولاش کرد بۆ بەردەوامبون لەسەر دیالۆگ بۆ چارەسەرکردنی کێشەی بودجە و دابینکردنی شایستە داراییەکانی فەرمانبەرانی هەرێمی کوردستان هاوشێوەی فەرمانبەرانی دیکە.
لەلای خۆیەوە باڵیۆزی ئەمریکا خواستی وڵاتەکەی دوپاتکردەوە بۆ پەرەپێدانی پەیوەندییەکانی نێوان هەردوو وڵات و باشترکردنی هاریکاری لەپێناو خزمەتکردنی هەردوو گەلی دۆست.
هەر لە دیدارەکەدا تیشکخرایەسەر دۆخی هەرێمی و نێودەوڵەتی و جەختکرایەوە لەسەر پشتگیریکردنی دەرفەتی ئاشتی و ئاسایش و سەقامگیری لەناوچەکەدا.