سەرۆک کۆمار پەیامێکی تایبەت ئاراستەی دانیشتوانی پارێزگای هەڵەبجە دەکات

23:41 2025-04-17 39995 عێراق 0

2025-04-17

39995

سەرۆک کۆمار دکتۆر لەتیف جەمال ڕەشید، پەیامێکی تایبەتی ئاراستەی پارێزگای هەڵەبجە کرد و تیایدا پیرۆزبایی بەپارێزگابونی هەڵەبجە لە دانیشتوانی پارێزگاکە کرد.
سەرۆک کۆمار لە پەیامێکدا کەدەستی موتەڵع کەوتووە، ستایشی هەوڵەکانی ئەنجوومەنی نوێنەرانی کرد بۆ پەسەندکردنی پرۆژەی یاسای گۆڕینی هەڵەبجە بۆ پارێزگا و داوای لە لایەنە پەیوەندیدارەکان کرد کاربکەن بۆ تەواوکردنی پڕۆژە خزمەتگوزارییەکان لە پارێزگاکەدا بەمەبەستی پەرەپێدان و گەشەپێدانی.
ئەمەی خوارەوە دەقی پەیامی سەرۆک کۆمارە بۆ دانیشتوانی پارێزگای هەڵەبجە:

بەناوی خودای گەورەو میهرەبان

خەڵکی تێکۆشەری هەڵەبجە
کەسوکاری سەربەرزی شەهیدان
بریندارانی کیمبارانی هەڵەبجەی شەهید

بە بونی هەڵەبجە بە پارێزگا پیرۆزبایی گەرم ئەکەین، لەرۆژی دەنگدانی پەرلەمان بەیاننامەیەکی فەرمی سەرۆکایەتی کۆمارمان دەرکرد، پێمان باشبوو بە تایبەتر پیرۆزبایی لەخەڵکی هەڵەبجە بکەین.
ئەمە هەنگاوێکی یاسایی و کارگێڕی دروستبوو بۆ گەشەپێدانی هەڵەبجە، دەستخۆشی لەئەنجومەنی نوێنەرانی عێراق دەکەین و ئاشکرایە هەر لە کۆنەوە هەڵەبجە مەڵبەندێکی ڕۆشنبیری وکلتوری پێشکەوتوو بوە و شاری هونەر و ئەدیب و شاعیران بوە، خەڵکەکەی لێوەشاوە و نیشتمان پەروەرن ، خاکەکەی بە پیت و ناوچەیەکی دڵڕفێن و گەشتیاریە.
بە هەموو توانامانەوە پشتگیری لەپارێزگای هەڵەبجە دەکەین و خزمەتی هەڵەبجە و زیاتر ئاوەدانکردنەوە و پێشخستنی دەکەین.
بێگومان کیمیابارانکردنی هەڵەبجە تاوانێکی جینۆسایدە، هەموو هەوڵێک لە کۆڕی نێودەوڵەتیدا ئەدەین، بۆ ئەوەی تاوانی کیمیابارانی هەڵەبجە بەشێوەیەکی یاسایی بە جینۆساید بناسرێت .
خەڵکی تێکۆشەرو بەوەفای هەڵەبجە، دڵنیاین ئێوەش لەگەڵ کۆمەڵانی خەڵکی و وەبەرهێنەری شارەکەتان و تەواوی وڵاتەکەمان کۆشش دەکەن بۆ ئاوەدانکردنەوەی زیاتری شارەکەتان، گیانی شەهیدانی هەڵەبجە و هەموو شەهیدانی وڵاتەکەمان شاد بێت و هەڵەبجەش هەمیشە شاری ئاشتی وهونەرو جوانی بێت.