عێراق بەکارهێنانی خاکەکەی بۆ هەر کارێکی سەربازی یان تێرۆریستی دژ بە هەر وڵاتێک ڕەت دەکاتەوە

20:34 2026-02-15 31549 عێراق 0

2026-02-15

31549

وەزارەتی دەرەوە، ئەمڕۆ یەکشەممە ڕایگەیاند، عێراق پێشێلکردن یان بەکارهێنانی خاک، ئاوە هەرێمییەکان یان کایەی ئاسمانیی وڵاتەکەی بۆ ئەنجامدانی هەر کارێکی سەربازی یان تێرۆریستی دژ بە هەر وڵاتێکی ناوچەکە و جیهان ڕەت دەکاتەوە.
وەزارەتی دەرەوە لە راگەیندراوێكدا کە دەست ئاژانسی موتەڵع کەوتووە، ڕایگەیاند: "محەمەد حوسێن بەحرولعلوم، بریکاری وەزارەتی دەرەوە بۆ پەیوەندییە دووقۆڵییەکان، بەشداری کرد لە ئاهەنگی چل و حەوتەمین ساڵیادی شۆڕشی ئیسلامی ئێران، کە باڵیۆزخانەی ئێران ڕۆژی هەینی، ١٣ی شوباتی ٢٠٢٦ لە بەغداد سازی کردبوو."
باڵیۆز بەحرولعلوم لە وتەیەکدا پیرۆزبایی حکومەتی عێراق و وەزارەتی دەرەوەی گەیاندە حکومەت و گەلی ئێران، و تیشکی خستە سەر پەیوەندییە مێژووییەکانی نێوان هەردوو وڵات کە لەسەر بنەمای هاوسێیەتی، ئایین، کولتوور و کۆمەڵایەتی بونیاد نراون.
هەروەها جەختی کردەوە کە "عێراق بەکارهێنانی خاک و ئاو و ئاسمانی خۆی بۆ ئاراستەکردنی هەر کارێکی سەربازی یان تێرۆریستی دژ بە هەر وڵاتێک، لەوانەش کۆماری ئیسلامی ئێران، ڕەت دەکاتەوە." هەروەها سەرکۆنەی هێرشە سەربازییەکانی (كیانی ئیسرائیل)ی کرد و ڕایگەیاند کە گرژییە سەربازییەکان هەڕەشەیەکی مەترسیدارن بۆ سەر ئاسایش و ئاشتی ناوچەکە، و جەختی کردەوە کە گفتوگۆ و دانوستانی دیپلۆماسی باشترین بژاردەن بۆ ڕووبەڕووبوونەوەی تەحەدییەکانی ئێستا.
لە کۆتاییدا، بەحرولعلوم سوپاسی محەمەد کازم ئال سادق، باڵیۆزی ئێران و ستافی باڵیۆزخانەکەی کرد بۆ هەوڵە بەردەوامەکانیان لە بەهێزکردنی پەیوەندییەکان و هیوای پێشکەوتنی بۆ گەلی ئێران خواست.