عێراقچی: تاوەکو ئێستا بریاری ده‌ستپێكردنه‌وه‌ی دانوستانمان لەگەڵ واشنتۆن نەداوە

23:51 2025-06-26 73982 عەرەبی و نێودەوڵەتی 0

2025-06-26

73982

عه‌باس عێراقچی وه‌زیری ده‌ره‌وه‌ی ئێران ئه‌مڕۆ پێنجشه‌ممه‌ رایگەیاند تاوەکو ئێستا بریاری دەستپێکردنەوەی دانوستانمان له‌گه‌ڵ واشنتۆن نەداوە،جەختیکردەوە ئەمریکا به‌ هاوكاری و یارمه‌تیدانی ئیسرائیل به‌مه‌به‌ستی هێرشكردنه‌ سه‌ر ئێران، خیانه‌تی له‌ دیپلۆماسییه‌ت و دانوستانه‌كان كرد.
‏
‏عه‌باس عێراقچی له‌لێدوانێكدا رایگه‌یاندوه‌، "نابێت هه‌ندێك قسه‌ و باس سه‌باره‌ت به‌ ده‌ستپێكردنه‌وه‌ی دانوستانه‌كان به‌ جددی وه‌ربگیرێت، به‌ڕاشكاوی ڕایده‌گه‌یه‌نم كه‌ هیچ ڕێككه‌وتنێك نه‌كراوه‌ و هیچ واده‌یه‌ك دیارینه‌كراوه‌ و هیچ گفتوگۆیه‌كیش بۆ ده‌ستپێكردنی دانوستانی نوێ نه‌كراوه‌".
‏
‏ڕونیشیكرده‌وه‌، "ئه‌وه‌ی ئێستا ده‌گوزه‌رێت ته‌نیا پێداچونه‌وه‌یه‌كی ناوخۆییه‌ كه‌ په‌یوه‌ندی به‌ به‌رژه‌وه‌ندییه‌كانی گه‌لی ئێرانه‌وه‌ هه‌یه‌ و ئه‌وه‌ش پرسێكی ته‌واو جیاوازه‌".
‏
‏باسی له‌وه‌شكرد، "ئه‌مریكا به‌ هاوكاری و یارمه‌تیدانی ئیسرائیل به‌مه‌به‌ستی هێرشكردنه‌ سه‌ر ئێران، خیانه‌تی له‌ دیپلۆماسییه‌ت و دانوستانه‌كان كرد، هه‌ربۆیه‌ ئێران هه‌ڵسه‌نگاندن بۆ ئه‌وه‌ ده‌كات، كه‌ ئایا دیپلۆماسی له‌گه‌ڵ واشنتن له‌ به‌رژه‌وه‌ندیی وڵاته‌كه‌ماندایه‌ یاخود نا".
‏
‏وه‌زیری ده‌ره‌وه‌ی ئێران ئاشكراشیكردوه‌، "ئیسرائیل به‌و هێرشانه‌ی كه‌ بۆ سه‌ر ئێران ئه‌نجامیدا، ده‌یویست خۆمان ڕاده‌ست بكه‌ین، به‌ڵام وه‌ك هه‌موان بینیان ئێران ملكه‌چ نه‌بو".
‏
‏عه‌باس عێراقچی سه‌باره‌ت به‌ دامه‌زراوه‌ ئه‌تۆمییه‌كانی ئێران رایگه‌یاندوه‌، "به‌هۆی هێرشه‌كانی ئیسرائیله‌وه‌، دامه‌زراوه‌ ئه‌تۆمییه‌كانمان زیانێكی زۆریان پێگه‌یشتوه‌، له‌ئێستاشدا بیر له‌وه‌ ده‌كه‌ینه‌وه‌ داوای قه‌ره‌بو بكه‌ینه‌وه‌".