ئەمڕۆ یەکشەممە،جومانه غەلای وتەبێژی کۆمسیۆنی باڵای سەربەخۆی هەڵبژاردنەکان رایگەیاند، هیچ کێشەیەک لە پرۆسەی دەنگدانی تایبەتدا نییە، هاوکات ئاماژەی بە دیاریکردنی 97 وێستگەی هەڵبژاردن بۆ ئاوارەکان کرد.
‏غەلای، بە ئاژانسی هەواڵی فەرمی ووت: پرۆسەی دەنگدانی تایبەت بەیانی ئەمڕۆ بە شێوەیەکی زۆر باش لە سەرجەم بنکەکانی دەنگدان لە سەرانسەری پارێزگاکاندا دەستیپێکرد.
‏ئاماژەی بەوەشدا : ژمارەی هێزە ئەمنییەکان کە مافی دەنگدانیان هەیە، گەیشتووەتە زیاتر لە ملیۆنێک و سێ سەد هەزار سەرباز.
‏ووتیشی : کۆمیسیۆن 809 بنکەی دەنگدانی کردووەتەوە بە 4501 وێستگەی هەڵبژاردن کە بۆ کارمەندانی هێزە ئەمنییەکان تەرخان کراوە، و هەموویان لە کاتژمێر حەوتی بەیانییەوە دەستیان بە کار کردووە بەبێ تۆمارکردنی هیچ گرفتێک.
‏"غلای" ڕوونیشیکردەوە کە دەنگدانی تایبەت ، ئاوارەکانیش دەگرێتەوە کە ژمارەیان زیاتر لە 26 هەزار دەنگدەری ئاوارەیە،و 27 بنکەی دەنگدان و 97 وێستگە لە کەمپەکانن و ئاوارەکانی شنگال لە ناوەوە و دەرەوەی کەمپەکان بۆیان تەرخان کراوە.
‏جەختی لەوەش کردەوە کە پرۆسەی هەڵبژاردن بە شێوەیەکی زۆر باش بەڕێوەدەچێت.
‏ئاماژەی بەوەشدا : کۆمیسیۆن ڕاپۆرتی کردنەوەی بنکەکانی بە سەرکەوتوویی بڵاوکردووەتەوە،و ڕاپۆرتێکی نیوەڕۆ بڵاودەکاتەوە بۆ بەدواداچوونی ڕێژەی بەشداریکردن، و دواتر ڕاپۆرتی داخستن دوای کۆتاییهاتنی دەنگدان بڵاو دەکاتەوە.
‏ئەوەشی خستە ڕوو : کە زیاتر لە 1000 چاودێری نێودەوڵەتی، چاودێری پرۆسەی هەڵبژاردن دەکەن کە سەردانی بنکە هەڵبژاردنەکانیان کردووە و لە چۆنیەتی بەڕێوەچوونی پرۆسەکە تێگەیشتوون، جگە لە چاودێرە نێوخۆییەکان کە ژمارەیان زۆرە و بریکارانی پارتە سیاسییەکان کە لە وێستگەکاندا ئامادەن.
‏لەلایەن خۆیەوە، "حەسەن هادی" ئەندامی ئەنجومەنی کۆمیسیاران لە کۆمیسیۆنی باڵای سەربەخۆی هەڵبژاردنەکان ڕاگەیاند: پرۆسەی هەڵبژاردن بە شێوەیەکی زۆر باش بەڕێوەدەچێت و هەماهەنگییەکی بەهێز لە نێوان کۆمیسیۆن و وەزارەتەکانی بەرگری و ناوخۆدا هەیە.
‏ئاماژەی بەوەشدا کە ڕێژەی بەشداریکردن لە دەنگدانی تایبەتدا نزیکەی نیوە بووە لە کاتژمێرەکانی یەکەمی دەنگداندا.
‏ڕوونیشیکردەوە : ئامێرەکانی هەڵبژاردن بە شێوەیەکی نایاب کار دەکەن و تا ئێستا هیچ گرفتێکی تەکنیکی تۆمار نەکراوە.
‏ئاشکراشیکرد : کە کۆمیسیۆن ژمارەیەک تاقیکردنەوەی تەکنیکی بۆ ئامێرەکانی هەڵبژاردن پێش ڕۆژی دەنگدان ئەنجام داوە، و هێزە ئەمنییەکان وەک دەنگدەر بەشدار بوون لە چوارچێوەی تاقیکردنەوەکەدا، و ئامێرەکان لێهاتوویی زۆریان سەلماندووە،و جەختی لەوەش کردەوە کە ئەوەی ئەمڕۆ لە مەیداندا ڕوودەدات، سەرکەوتنی ئەو تاقیکردنەوانە بەرجەستە دەکات، چونکە پرۆسەکە بەپێی ئەوەی بە وردی پلانی بۆ دانرابوو بەڕێوەدەچێت.
‏هادی ئەوەشی خستە ڕوو : کە دەنگدان تا کاتژمێر شەشی ئێوارە بەردەوام دەبێت.