مالیکی فایلە سیاسییە هەستیارەکان و ڕێبازی داهاتووی عێراق و ڕۆڵی هەرێمایەتی ئاشکرا دەکات

22:00 2025-11-22 26372 عێراق 0

2025-11-22

26372

نوری مالیكی، سەرۆکی هاوپەیمانی دەوڵەتی یاسا ڕایگه‌یاند، لایه‌نه‌كانی کورد دەبێت پەلەبكه‌ن لە هەڵبژاردنی كاندیدێك بۆ پۆستی سه‌رۆك كۆماری عێراق و سوننەکانیش سەرۆکی پەرلەمان هەڵبژێرن، ده‌شڵێت، "گروپە چەکدارەکان ئامادەن تێكەڵ بە دەوڵەت ببن و چەکە قورسەكانیان رادەست بکەن".
نوری مالیكی له‌میانی چاوپێكه‌وتنێكدا باسی له‌وه‌كردوه‌، "چوارچێوەی هەماهەنگی پێوەرێکی دیاریکراوی بۆ سەرۆک وەزیرانی داهاتو داناوە و بڕیاری نەداوە لە خولی دوەمی سەرۆک وەزیرانی ئێستا، محەمەد شیعە سودانی بێبەش بکرێت". بەڵام جەختیشی لەوە کردەوە کە سەرۆک وەزیرانی داهاتو ڕوبەڕوی کێشەی گەورە دەبێتەوە، دیارترینیان قەیرانی داراییە.

ئاماژه‌ی به‌وه‌شكردوه‌، گروپه‌ چه‌كداره‌كانی عێراق خواستیان هەیە بۆ تێکەڵبون بە دەوڵەت و ڕادەستکردنی چەکی قورس، عێراق دەیەوێت ڕۆڵی ناوبژیوانی نێوان ئەمریکا و ئێران ببینێت و نایەوێت بەشێک بێت لە ڕوبەڕوبونەوەی نێوانیان.

په‌یوه‌ست به‌ ناكۆكیه‌كانی نێوان هه‌رێمی كوردستان و به‌غدا، نوری مالیكی هه‌روه‌ها وتی، "ناکۆکییەکانی نێوان هەرێم و حکومەتی ناوەندی بە ڕێککەوتنی کاتی چارەسەر ناکرێن، بەڵکو بە دەرکردنی یاسا چارەسەر ده‌کرێن، شیعەکان لە عێراق هاوشێوه‌ی كورد هه‌مان زوڵم و زۆرداریان به‌خۆوه‌بینی له‌سه‌ر ده‌ستی رژێمی پێشو".

له‌باره‌ی پێكهێنانی حكومه‌تیشه‌وه‌ ده‌ڵێت، "پێکهێنانی حکومەت پەیوەستە بە تەوافوقەوە، دەکرێت مانگێک دوای پەسەندکردنی ئەنجامەکان پێکبهێنرێت، کورد دەبێت پەلە بکات لە هەڵبژاردنی سەرۆکی کۆمار و سوننە بۆ سەرۆکی پەرلەمان".