موجتەبا خامنەیی، ڕێبەری ئێران لە یەکەم وتاریدا بۆ گەلی ئێران، جەختی لە شکستپێهێنانی هەوڵەکانی دابەشکردنی وڵات کردەوە. لە کاتێکدا جەختی کردەوە کە ئێران لە تۆڵەسەندنەوەی خوێنی شەهیدان درێغی ناکات، ئاماژەی بەوەش کرد کە ئێران لە بنکە ئەمریکییەکانی ناوچەکە کراوەتە ئامانج و ناچارە وەڵام بداتەوە، داواشی لە وڵاتان کرد ئەو بنکانە دابخەن.

دەقی تەواوی وتارەکە:

بەناوی خوای بەخشندە و میهرەبان

لە سەرەتای قسەکانمدا، دەبێت سەرەخۆشی لە گەورەمان (عەجەلەڵڵا تەعالا فەرەجەهـ) بکەم بەبۆنەی شەهیدبوونی سەرکردەی مەزنی شۆڕش، خامنەیی ئازیزی دانا، و داوا لە حەزرەتیان دەکەم نزا و خێری هەبێت بۆ هەر تاکێکی نەتەوەی مەزنی ئێران، بەڵکو بۆ هەموو موسڵمانانی جیهان و خزمەتکارانی ئیسلام و شۆڕش و قوربانیدەران و کەسوکاری شەهیدان لە بزووتنەوەی ئیسلامیدا، بەتایبەت لە جەنگی ئەم دواییەدا، و بۆ خۆشم.

بەشی دووەمی قسەکانم ئاراستەی نەتەوەی مەزنی ئێران دەکەم. لە سەرەتادا دەبێت بە کورتی هەڵوێستی خۆم سەبارەت بە دەنگدانی ئەنجومەنی شارەزایانی (مەجلیسی خوبەرەگان) ڕێزدار ڕوون بکەمەوە. ئەم خزمەتکارەی ئێوە، سەید موجتەبا حسێنی خامنەیی، لە هەمان کاتی ئێوەدا و لە ڕێگەی شاشەی کۆماری ئیسلامییەوە ئاگاداری ئەنجامی دەنگدانی ئەنجومەنی شارەزایان بووم. بۆ من، دانیشتن لە شوێنێک کە جێگەی دوو سەرکردەی مەزن بووە، خومەینی گەورە و خامنەیی شەهید، کارێکی سەختە. چونکە ئەم شوێنە مێژووی دانیشتنی کەسێکی هەیە کە زیاتر لە ٦٠ ساڵی تەمەنی لە جیهاد لە پێناوی خوادا بەسەر بردووە، و وازی لە هەموو جۆرە چێژ و حەسانەوەیەک هێناوە، تا ببێتە گەوهەرێکی درەوشاوە و کەسایەتییەکی دیار نەک تەنها لە سەردەمی ئێستادا، بەڵکو لە مێژووی فەرمانڕەوایانی ئەم وڵاتەدا. ژیان و مردنی پەیوەست بوو بە مەزنی و شکۆوە کە لە ئەنجامی پشت بەستن بە حەق هاتبووە دی.

تۆفیقی ئەوەم هەبوو جەستەی پیرۆزی دوای شەهیدبوونی ببینم؛ ئەوەی بینیم کێوێک بوو لە خۆڕاگری و بیستم کە دەستە ساغەکەی بە توندی کرابوو بە مشت . سەبارەت بە لایەنە جیاوازەکانی کەسایەتی ئەو، دەبێت شارەزایان بۆ ماوەیەکی درێژ باس لە زۆر شت بکەن. لەم بوارەدا تەنها بەم کورتەیە واز دەهێنم و وردەکارییەکان بۆ بۆنەی گونجاوی تر جێدەهێڵم. هەر ئەمەشە هۆکاری سەختیی دانیشتن لەسەر کورسی ڕێبەرایەتی دوای کەسێکی وا، و تەواوکردنی ئەم مەودایە تەنها بە یارمەتی خودا و هاوکاریی ئێوەی خەڵک دەبێت.

دوای ئەوە، پێویستە جەخت لە خاڵێک بکەمەوە کە پەیوەندی ڕاستەوخۆی بە قسەکانمەوە هەیە. ئەو خاڵە ئەوەیە کە یەکێک لە هونەرەکانی ڕێبەری شەهید و پێشینە مەزنەکەی، بەشدارپێکردنی خەڵک بوو لە هەموو بوارەکاندا، و پێدانی تێگەیشتن و هۆشیاریی بەردەوام بەوان، و پشت بەستنی کردەیی بە هێزی ئەوان. ئەوان مانای ڕاستەقینەی جەماوەر و کۆمارییان چالاک کرد و لە ناخی دڵیانەوە باوەڕیان پێی هەبوو. کاریگەریی ئەمەش بە ڕوونی لەم چەند ڕۆژەی ڕابردوودا دەرکەوت کە وڵات بەبێ ڕێبەر و بەبێ فەرماندەی باڵای هێزە چەکدارەکان بوو. دووربینی و زیرەکیی نەتەوەی مەزنی ئێران لە ڕووداوەکەی دواییدا و خۆڕاگری و ئازایەتی و ئامادەیی، وای کرد دۆستان ستایشی بکەن و دوژمنان سەرسام بن. ئێوە بوون کە وڵاتتان بەڕێوەبرد و گەرەنتی هێزەکەی بوون.

هۆکاری بەکارهێنانی ئایەتی پیرۆز (ما ننسخ من آية...) ئەوە نییە کە خۆم لە ئاستی ڕێبەری شەهیددا ببینم، چونکە چۆن دەبێت من لەو باشتر بم؛ بەڵکو بۆ ڕاکێشانی سەرنجە بۆ ڕۆڵی گەورە و دیاری ئێوەی گەلی ئازیز. بزانن ئەگەر هێزی ئێوە لە گۆڕەپانەکەدا دەرنەکەوێت، نە ڕێبەرایەتی و نە هیچ کام لە دەزگا جیاوازەکان کە ئەرکی ڕاستەقینەیان خزمەتکردنی خەڵکە، کاریگەریی پێویستیان نابێت. بۆ ئەوەی ئەم مانایە بە باشترین شێوە بێتە دی، یەکەم: دەبێت خودای گەورەمان لە یاد بێت و پشت و پەنای بگرین و پەنا بۆ نووری مەعسومەکان (سڵاوی خوایان لەسەر بێت) ببەین وەک گەورەترین دەرمان کە هەموو جۆرە فەتح و سەرکەوتنێکی حەتمی بەسەر دوژمندا مسۆگەر دەکات. ئەمە تایبەتمەندییەکی مەزنە کە ئێوە هەتانە و دوژمنانتان لێی بێبەشن.

دووەم: نابێت هیچ زیانێک بە یەکڕیزی نێوان تاکەکان و چینەکانی نەتەوە بگات کە زۆربەی کات لە کاتی تەنگانەدا بە تایبەتی دەردەکەوێت. ئەمەش بە چاوپۆشیکردن لە خاڵە جیاوازەکان بەدی دێت.

سێیەم: دەبێت ئامادەیی کارا لە گۆڕەپانەکەدا بپارێزرێت؛ چ وەک ئەوەی لەم ڕۆژ و شەوانەی جەنگدا نیشانتان دا، یان لە ڕێگەی ڕۆڵە کاراکانتان لە بوارە کۆمەڵایەتی، سیاسی، پەروەردەیی، ڕۆشنبیری و تەنانەت ئەمنییەکاندا. گرنگ ئەوەیە ڕۆڵە دروستەکە بە باشی تێبگەین و تا دەکرێت جێبەجێی بکەین بەبێ ئەوەی زیان بە یەکڕیزی کۆمەڵایەتی بگات. یەکێک لە ئەرکەکانی ڕێبەرایەتی و هەندێک لە بەرپرسانی تر، وەبیرهێنانەوەی هەندێک لەم ڕۆڵانەیە بۆ تاکەکان یان چینەکانی کۆمەڵگە. هەر بۆیە ئاماژە بە گرنگی ئامادەبوون لە ڕێوڕەسمی ڕۆژی قودسی ١٤٤٧ دەکەم کە دەبێت شکاندنی دوژمن تێیدا جێگەی بایەخی هەمووان بێت.

چوارەم: لە هاوکاری و یارمەتیدانی یەکتر نەوەستن. سوپاس بۆ خودا، ئەم سیفەتە هەمیشە یەکێک بووە لە سیفەتەکانی زۆربەی ئێرانییەکان، و چاوەڕوان دەکرێت لەم ڕۆژە تایبەتانەدا زیاتر دەربکەوێت. لەم بوارەدا داوا لە دەزگا خزمەتگوزارییەکان دەکەم درێغی نەکەن لە هیچ یارمەتی و پاڵپشتییەک بۆ ئەو چینە ئازیزانەی نەتەوە و بۆ دەزگا جەماوەرییەکانی فریاگوزاری.

ئەگەر ئەم لایەنانە ڕەچاو بکرێن، ڕێگەی گەیشتن بە ڕۆژانی شکۆی نەتەوە خۆشەویستەکەتان تەخت دەبێت. ڕەنگە باشترین نموونە بۆ ئەوە، بە ویستی خودا، سەرکەوتن بێت بەسەر دوژمندا لەم جەنگەدا.

بەڵام بەشی سێیەمی قسەکانم، سوپاس و پێزانینی قووڵمە بۆ پاڵەوانە قارەمانەکانمان کە لەو بارودۆخەی نەتەوە و نیشتمانە خۆشەویستەکەمان ڕووبەڕووی هێرشی ستەمکارانەی سەرکردەکانی بەرەی خۆبەزلزان بووەوە، ڕێگەیان لە دوژمن گرت بە لێدانە جەرگبڕەکانیان، و ئەو خەیاڵەیان لەناو بردن کە دەیانویست کۆنترۆڵی نیشتمان بکەن یان دابەشی بکەن.

برایانی قارەمان! داواکاری جەماوەری خەڵک، بەردەوامبوونی بەرگرییەکی کارایە. هەروەها دەبێت بەردەوام بین لە بەکارهێنانی میکانیزمی داخستنی گەرووی هورمز. لێکۆڵینەوە کراوە بۆ کردنەوەی بەرەی تر کە دوژمن تێیدا بێ ئەزموونە و ڕووبەڕووی مەترسی گەورە دەبێتەوە، و ئەگەر جەنگ بەم شێوەیە بەردەوام بێت، ئەو بەرانە چالاک دەکرێن.

سوپاسی بێپایانم بۆ جەنگاوەرانی بەرەی مقاوەمە . ئێمە وڵاتانی بەرەی مقاوەمە بە نزیکترین دۆستی خۆمان دەزانین، و پرسی مقاوەمە و بەرەی مقاوەمە بەشێکی جیانەکراوەیە لە بەهاکانی شۆڕشی ئیسلامی. گومان لەوەدا نییە کە یەکڕیزیی پێکهاتەکانی ئەم بەرەیە ڕێگەی ڕزگاربوون لە فیتنەی زایۆنی کورت دەکاتەوە؛ وەک بینیمان، یەمەنییە قارەمانەکان لە بەرگریکردن لە گەلی چەوساوەی غەززە نەوەستان، و حزبوڵڵای دڵسۆز بۆ یارمەتیدانی کۆماری ئیسلامی هات سەرەڕای هەموو سەختییەکان، و مقاوەمەی عێراقیش بە هەمان شێوە هەڵوێستێکی ئازایانەی وەرگرت.

لە بەشی چوارەمدا، ڕوو لەوانە دەکەم کە لەم چەند ڕۆژەی ڕابردوودا زیانیان بەرکەوتووە، چ ئەوانەی ئازیزێکیان لەدەستداوە، یان بریندار بوون، یان ماڵ و دوکانەکانیان زیانی بەرکەوتووە. لەم بەشەدا، سەرەتا سەرەخۆشی قووڵی خۆم ئاراستەی خێزانی شەهیدە بەڕێزەکان دەکەم. لە پاڵ باوکمدا، کە کۆچی دوایی ئەو بووە پرسێکی گشتی، من هاوسەری خۆشەویست و دڵسۆزم بەجێیهێشتم، کە هیوایەکی زۆرم پێی هەبوو، هەروەها خوشکە دڵسۆزەکەم کە خۆی بۆ خزمەتی دایک و باوکی تەرخان کردبوو و پاداشتی خۆی وەرگرت، هەروەها منداڵە بچووکەکەی و مێردی خوشکەکەی ترم، کە پیاوێکی زانا و فازڵ بوو، هەموویان لە ڕیزی شەهیدانن. ئەوەی وا دەکات سەبر لە بەرامبەر ناخۆشییەکاندا بێتە دی، پەیوەستبوونە بە بەڵێنی خودا بۆ پاداشتی گەورەی سابیران.

دووەم، جەخت بۆ هەمووان دەکەمەوە کە ئێمە لە تۆڵەسەندنەوەی خوێنی شەهیدەکانتان درێغی ناکەین. ئەو تۆڵەیەی مەبەستمانە تەنها بۆ شەهیدبوونی ڕێبەری مەزنی شۆڕش نییە، بەڵکو هەر تاکێکی نیشتمان کە لەسەر دەستی دوژمن شەهید بکرێت، دەبێتە قوربانییەک بۆ تۆڵەسەندنەوە. بێگومان تا ئێستا تەنها بەشێکی کەمی ئەم تۆڵەیە هاتووەتە دی، بەڵام تا تەواوبوونی، ئەم پرسە لە سەرووی کارە لەپێشینەکانمان دەبێت. هەر بۆیە ئەو تاوانەی دوژمن بە ئەنقەست لە پرسی قوتابخانەی "شەجەرەی تەییبەی میناب" و هەندێک پرسی هاوشێوەدا ئەنجامی دا، پێگەیەکی تایبەتی هەیە لەم لێکۆڵینەوەیەدا.

سێیەم، دەبێت بریندارانی ئەم هێرشانە خزمەتگوزاریی پزیشکیی گونجاو بە خۆڕایی وەربگرن. چوارەم، دەبێت ڕێکاری گونجاو بۆ قەرەبووکردنەوەی زیانە داراییەکانی موڵک و ماڵی خەڵک و بیناکان جێبەجێ بکرێت.

ئەمەوێت جەخت بکەمەوە کە ئێمە لە هەموو بارودۆخێکدا داوای قەرەبوو لە دوژمن دەکەین، ئەگەر ڕەتی بکاتەوە، ئەوا لە موڵک و ماڵی ئەوان ئەوەی بە گونجاوی دەزانین وەری دەگرین، و ئەگەر ئەوەش نەکرا، ئەوا لە موڵک و ماڵیان بەقەد ئەوە تێک دەدەین.

بەشی پێنجەمی وتارەکە ئاراستەی سەرکردە و کەسایەتییە کاریگەرەکانی هەندێک وڵاتی ناوچەکە دەکەم. ئێمە پازدە وڵاتی دراوسێمان هەیە لە وشکانی و دەریادا، و هەمیشە ویستوومانە پەیوەندیی دۆستانە و بونیادنەرمان لەگەڵ هەموویان هەبێت. بەڵام دوژمن ساڵانێکە بنکەی سەربازی و دارایی لە هەندێک لەم وڵاتانەدا دروست کردووە بۆ چەسپاندنی هەیمەنەی خۆی بەسەر ناوچەکەدا. لە هێرشی ئەم دواییەدا، هەندێک لەو بنکە سەربازییانە بەکارهێنران، و وەک بە ڕاشکاوی هۆشداریمان دابوو، هێرشمان کردە سەر ئەو بنکانە بەبێ ئەوەی هێرش بکەینە سەر ئەو وڵاتانە. لەمەودواش بەردەوام دەبین لەسەر ئەم ڕێڕەوە. پێویستە ئەم وڵاتانە ئەرکی خۆیان بەرامبەر دەستدرێژیکاران بۆ سەر نیشتمانمان و بکوژانی گەلەکەمان ڕوون بکەنەوە. پێشنیار دەکەم ئەو بنکانە لە زووترین کاتدا دابخرێن، چونکە دەبێت ئێستا تێگەیشتبن کە ئیدعای ئەمریکا بۆ بەدیهێنانی ئاسایش و ئاشتی تەنها درۆ بوو. ئەمە یارمەتییان دەدات پەیوەندییەکانیان لەگەڵ گەلەکانیاندا بەهێز بکەن، کە بە گشتی بێزارن لە پەیوەندییان بە بەرەی کافر و ڕەفتارە سووکایەتیپێکراوەکانیان. دووبارەی دەکەمەوە کۆماری ئیسلامی بەبێ ئەوەی هەوڵی سەپاندنی هەیمەنە و ئیستیعمار بدات لە ناوچەکەدا، بە تەواوی ئامادەیە بۆ یەکڕیزی و دروستکردنی پەیوەندیی دۆستانە و ڕاستگۆیانە لەگەڵ هەموو دراوسێکانی.

لە بەشی شەشەمی وتارەکەدا، سەرنجم لەسەر ڕێبەرە شەهیدەکەمانە. ئەی ڕێبەر! بە ڕۆیشتنت، دڵی هەمووانت گران کرد. هەمیشە ئاواتەخوازی ئەم کۆتاییە بوویت تا خودای گەورە وەڵامی دایتەوە کاتێک خەریکی خوێندنەوەی قورئانی پیرۆز بوویت لە بەیانی ڕۆژی دەیەمی ڕەمەزاندا. زۆر ستەمت بە سەبر و خۆڕاگرییەوە چەشت. زۆر کەس قەدری ڕاستەقینەی تۆیان نەزانی، و ڕەنگە کاتێکی زۆری بوێت تا هەموو پەردە و ئاستەنگەکان لادەچن و هەندێک لایەنی ڕوون دەبنەوە.

هیوادارین بەردەوام بن لە بیرکردنەوە لە پێشکەوتنی ئەم نەتەوەیە و هەموو نەتەوەکانی بەرەی مقاوەمە، و نزا بۆیان بکەن، وەک چۆن لە ژیانی دونیاتاندا کردتان. و بەڵێنتان پێ دەدەین کە هەموو هەوڵێک دەدەین بۆ بەرزکردنەوەی ئەم ئاڵایە، کە ئاڵای سەرەکیی بەرەی حەقە، و بۆ بەدیهێنانی ئامانجە باڵاکانتان.

لە بەشی حەوتەمدا، دەمەوێت سوپاسی هەموو ئەو کەسایەتییە بەڕێزانە بکەم کە پاڵپشتییان کردم، لەوانە پیاوانی ئایینی گەورە و کەسایەتییە ڕۆشنبیری و سیاسی و کۆمەڵایەتییەکان، و ئەو گەلەی کە لە کۆبوونەوە مەزنەکاندا ئامادە بوون بۆ نوێکردنەوەی دڵسۆزییان بۆ نیزام، هەروەها بەرپرسانی هەر سێ دەسەڵاتەکە و ئەنجومەنی ڕێبەرایەتی کاتی بۆ هەوڵ و ڕەفتارە باشەکانیان.

لە کۆتاییدا، داوا لە پەروەردگارمان دەکەم، نەسری حەتمی بۆ نەتەوەکەمان بەسەر دوژمندا بەدی بهێنێت، و عیزەت و خۆشگوزەرانی و خێرمان پێ ببەخشێت، و پلە و پایەی بەرز بۆ کۆچکردووەکانمان لە کۆتاییدا دابین بکات