هێزەکانی ڕوسیا لە ماوەی هەفتەیەکدا حەوت شارۆچکەیان کۆنترۆڵ کردووە

21:11 2025-08-01 74384 عەرەبی و نێودەوڵەتی 0

2025-08-01

74384

ئەمڕۆ هەینی ،وەزارەتی بەرگری ڕوسیا جەختیکردەوە، لە ماوەی هەفتەی ڕابردوی شەڕ لە چەندین بەرە روویداوە، هێزەکانیان توانیویانە حەوت شارۆچکە کۆنترۆڵ بکەن.
‏
‏وەزارەتی بەرگری ڕوسیا، لە ڕاگەیەندراویكدا رایگەیاند، "لە ماوەی 26ی تەمموز تا 1ی ئاب، هێزەکانی ڕوسیا، حەوت هێرشی بەکۆمەڵیان بە چەکی ورد و فڕۆکەی بێفڕۆکەوانی هێرشبەرییەوە ئەنجامدا.
‏ئاماژەی بەوەشكرد، لە هێرشەكاندا دامەزراوەکانی کۆمەڵگەی پیشەسازیی سەربازیی لە ئۆکرانیا، ژێرخانی فڕۆکەخانە سەربازییەکان، پێگەكانی بەرهەمهێنانی فڕۆکەی بێفڕۆکەوان و پێکهاتەکانی، خاڵەکانی کۆنترۆڵی فڕۆکە بێفڕۆکەوانە دورمەوداکان، کۆگاکانی سیستەمی ڕۆبۆتی، چەکی موشەکی و تەقەمەنی، هەروەها خاڵەکانی نیشتەجێبونی کاتیی یەکە ئۆکرانییەکان و ناسیۆنالیستەکان و بەکرێگیراوە بیانییەکانیان کردە ئامانج".
‏
‏بەگوێرەی ڕاگەیەندراوەكە، یەکەکانی گروپی هێزەکانی ناوەند بەردەوام بون لە ئۆپەراسیۆنە هێرشبەرییەکانیان لەسەر خاکی دۆنێتسک و پارێزگای دنیپرۆپترۆڤسک لە ماوەی هەفتەکەدا، بایکۆڤکا و بلگیکا و نۆڤۆئۆکرینکایان کۆنترۆڵ کردوە، کە سەر بە دۆنێتسکن
‏ئەوەشیخستەڕو، "لە ماوەی هەفتەیەکدا، یەکەکانی گروپی ڕۆژهەڵات چونەتە قوڵایی بەرگرییەکانی دوژمنەوە و شارۆچکەکانی زیلیۆنی گای لە دۆنێتسک، مالیڤکا لە پارێزگای دنیپرۆپترۆڤسک و تیمیرۆڤکا لە پارێزگای زاپۆریژیایان کۆنترۆڵکردوە".
‏
‏وەزارەتەکە هەروەها ڕایگەیاند کە یەکەکانی هێزەکانی "باشور" شاری چاسیڤ یاریان لە دۆنێتسک کۆنترۆڵ کردوە، و زیانەکانی هێزەکانی ئۆکرانیا لە ماوەی هەفتەیەکدا زیاتر لە هەزار و 325 سەرباز و دو تانک بون تەنهاو لەو بەرەیەدا.