پرسی کورد بووە هۆی مشتومڕێکی توند لە پەرلەمانی تورکیا لە نێوان سەرۆکی دوو پارت

14:58 2023-11-01 26555 عەرەبی و نێودەوڵەتی 0

2023-11-01

26555

پرسی کورد بووە هۆی مشتومڕێکی توند لە پەرلەمانی تورکیا لە نێوان سەرۆکی پارتی بزوتنەوەی ناسیۆنالیستی تورکی (MHP) و هاوسەرۆکی پارتی یەکسانی و دیموکراتی گەلانی کوردی (HEDEP).
لە کۆبوونەوەی هەفتانەی فراکسیۆنی (MHP) لە پەرلەمانی تورکیا، سەرۆکی (MHP) دەولەت بەهچەلی وەڵامی ڕەخنەکانی هەندێک لە حیزبەکانی ئۆپۆزسیۆنی دایەوە سەبارەت بەو هەنگاوانە و سیاسەتانەی لە ماوەی 100 ساڵی کۆماری تورکیادا گرتوویانەبەر.
سەبارەت بە زمانی کوردی، دەولەت بەهچەلی هێرشی کردە سەر ئەندامانی پارتی یەکسانی و دیموکراتی گەلانی کوردی و گوتی: "هەموو ناسیۆنالیستە تورکەکان بە تورکی قسە دەکەن، بەڵام چەند لەوانەی شوێنی پەکەکە دەکەون بە کوردی قسە دەکەن؟، ئەگەر ئێمە دەست بکەین بە گوتنی ڕاستییەکان، ئەوان ناتوانن نەک تەنها لە پەرلەمانی تورکیا بگەڕێن، بەڵکو لە شەقامەکانی ئەنقەرە و دیاربەکر (ئامەد) بگەڕێن".
لەلای خۆیەوە، هاوسەرۆکی پارتی یەکسانی و دیموکراتی گەلان (HEDEP) تۆنگەر بەیکەرهان لە میانەی کۆبوونەوەکەی پەرلەمانی تورکیا وەڵامی دەولەت بەهچەلی دایەوە و بە زمانی کوردی گوتی: "خودا زمانی کوردی پێداوین و هەرکەسێک زمانی کوردی قبوڵ نەکات خودا قبوڵی ناکات، هیوادارین ئەو کەسەی ڕقی لە زمانی کوردیە خودا تووشی دەرد و بەڵای بکات".
وتیشی: "ئێمە کوردین و لە کوردستانەوە هاتووین, زمانی ئێمە کوردییە، نیشتیمانمان کوردستانە، کەلتوور و هونەری ئێمە زۆر بەرچاوە، ئەو کارانە ناکەین کە ئێوە دەیکەن و هێرش ناکەینە سەرتان، پێویستە ئێمە قبوڵ بکەن، ئێوە دەڵێن کە زمان و کلتووری کوردی قەدەغە دەکەن و ئێمە هەموومان دەکەن بە تورک، ئێمە هیچ شتێک بە خەڵکی تورکیا ناڵێین، بەڵام ئێوە بەتەواوی فاشیستن و ئێمە دژی ئەم فاشیزمە دەوەستین".