شاندێکی وەزارەتی نەوتی عێراق سەردانی هەرێم دەکات بۆ ڕێککەوتن لە داهاتی هەناردەی نەوت

10:28 2025-02-19 137981 كوردستان 0

2025-02-19

137981

حەیان عەبدولغەنی، وەزیری نەوتی عێراق ڕۆژی سێشەممە ڕایگەیاند، کە وەفدێکی وەزارەتی نەوتی عێراق سەردانی هەرێمی کوردستان دەکات بۆ ڕێککەوتن لەسەر میکانیزمێک بۆ وەرگرتن و هەناردەکردنی نەوتی هەرێم لەڕێگەی بەندەری جەیهانی تورکیاوە.
وەزیری نەوتی عێراق لە لێدوانێکی ڕایگەیاند: وەفدێکی وەزارەتی نەوت بە سەرۆکایەتیی بریکاری وەزارەتی نەوت بۆ کاروباری دەرهێنان و بەشی یاسایی و ئابووری و کۆمپانیای بازاڕی نەوت سەردانی هەولێر دەکەن بۆ دانوستان لەسەر میکانیزمێک بۆ وەرگرتنی نەوتی هەرێم.
وەزیری نەوتی عێراق ئەوەشی خستەڕوو، پەیوەندی لەگەڵ وەزیری سامانە سروشتییەکانی هەرێم کەمال محەممەد کراوە بۆ دانوستان لەگەڵ وەفدەکە لەسەر میکانیزمی وەرگرتن و هەناردەکردنی نەوت لەڕێگەی بەندەری جەیهانی تورکیاوە.

ئەمەش لەکاتێکدا ڕۆژی یەکشەممەی ئەم هەفتەیە، لیژنەی یاسایی پەرلەمانی عێراق ڕایگەیاند، کە هەرێمی کوردستان له ڕێگەی سۆمۆوه دەستی به هەناردەکردنی نەوت کردووه و لیژنەکە گەشبینین به چارەسەرکردنی قەیرانی مووچەی هەرێمی کوردستان.
دارا حەمە، ئەندامی لیژنەی یاسایی پەرلەمانی عێراق ڕۆژی یەکشەممە جەختیکردەوە، کە هەرێمی کوردستان بەپێی ڕێککەوتنەکانی نێوان حکومەتی فیدراڵی و هەرێم دەستیکردووە بە هەناردەکردنی نەوت لەڕێگەی کۆمپانیای سۆمۆوە و ئاماژەی بەوەشکرد، کە ئەمە گەشبینییەک دەخوڵقێنێت بۆ چارەسەرکردنی قەیرانی مووچەی فەرمانبەرانی هەرێمی کوردستان.
دارا حەمە لە لێدوانێکیدا بۆ ئاژانسی ئەل"موتەڵع"، ڕۆژی یەکشەممە گوتوویەتی: "فەرمانبەرانی هەرێم باجی ناکۆکییەکانی نێوان حکومەتی بەغدا و هەولێریان داوە"، دەشڵێت: وەک لیژنەی یاسایی داوای هەنگاوی پێویستیان کردووە بۆ کۆتاییهێنان بە قەیرانەکانیان.
ئەندامی لیژنەی یاسایی ئەنجومەنی نوێنەرانی عێراق دارا حەمە دەشڵێت: "ئێمە گەشبینین بە دەنگدان لەسەر یاسای بودجە بۆ چارەسەرکردنی کێشەکانی نێوان هەردوولا، چونکە هەناردەکردنی نەوت لە ڕێگەی سۆمۆوە دەستیپێکردووە و ئەمەش دەبێتە هۆی زیادبوونی داهات و چارەسەرکردنی قەیرانی مووچەی فەرمانبەران".