ئەنجومەنی دادوەری پابەندبوونی سەرۆکایەتییەکان بە جیاکردنەوەی دەسەڵاتەکان بەرز دەنرخێنێت

21:00 2025-07-10 67974 عێراق 0

2025-07-10

67974

ئەنجومەنی باڵای دادوەری، ڕۆژی پێنجشەممە، هەڵوێستی سەرۆکایەتییەکان و سەرکردەی حزبەکانی بۆ ڕێزگرتن لە بنەمای جیاکردنەوەی دەسەڵاتەکان بەرزنرخاند.
ئەنجوومەنی باڵای دادوەری لە بەیاننامەیەکدا کە بە ئاژانسی هەواڵی ئەلموتەلا گەیشتووە، ئاماژەی بەوەکردووە، "ئەمڕۆ ئەنجومەنی باڵای دادوەری دانیشتنی دەیەمی خۆی بە سەرۆکایەتیی سەرۆکی دادگای تێهەڵچوونەوەی فیدڕاڵی دادوەر فائق زیدان ئەنجامدا، دانیشتنەکە بە یادی دادوەرە خانەنشینکراوەکان دەستیپێکرد: محەمەد ساحیب محەمەد، جەلال حەمید عەبدولڕەحمان، و ئیحسان سەتار خدر، کە کۆچی دواییان کرد".
ئاماژەی بەوەشکرد، "ئەنجومەن پیرۆزبایی لە دادوەر مونزر ئیبراهیم حسێن کرد بەبۆنەی دەستنیشانکردنی وەک سەرۆکی دادگای باڵای فیدراڵی، هەروەها دادوەر حەسەن فوئاد مونعیم بەبۆنەی دەستنیشانکردنی وەک ئەندامی یەدەگی هەمان دادگا".
ئەنجومەن هەڵوێستی سەرۆک کۆمار و سەرۆک وەزیران و سەرۆکی ئەنجوومەنی نوێنەران و سەرکردەی پارت و هێزە سیاسییەکانی بۆ ڕێزگرتن لە پرەنسیپی جیاکردنەوەی دەسەڵات و سەربەخۆیی دادوەری ستایشی کرد. ئەویش بە دەستوەرنەدان لە پرسی دەستلەکارکێشانەوەی هەندێک لە دادوەرەکانی دادگای فیدراڵی، بابەتەکەیان بۆ دەسەڵاتی دادوەری بەجێهێشت کە تەنها لەناو دەسەڵاتی دادوەریدا مامەڵەی لەگەڵدا بکات.
لە درێژەی بەیاننامەکەدا هاتووە، "ئەنجومەن بڕیاریدا ژمارەیەک دادوەر بەرزبکرێتەوە، جگە لە گواستنەوە و پاڵپشتیکردن و پێدانی پۆستی دادوەری، بە پشتبەستن بە پەسەندکردنی پێکهێنانەکان لە هەندێک لە سەرۆکایەتییەکانی دادگاکانی تێهەڵچوونەوە، بەپێی ئەو پێشنیارانەی کە لەلایەن ئەو سەرۆکایەتییانە پێشکەشکراون، و لەسەر بنەمای مەرجەکانی بەرژەوەندی گشتی".