شێخ جەعفەر شێخ مستەفا پێشوازی لە كونسوڵی گشتی هۆڵەندا لە هەولێر دەکات

22:32 2024-01-10 33092 كوردستان 0

2024-01-10

33092

ئەمڕۆ چوارشەممە ٢٠٢٤/١/١٠ شێخ جەعفەر شێخ مستەفا جێگری سەرۆكی هەرێمی كوردستان، پێشوازی لە یاكۆ بیرێندس كونسوڵی گشتی هۆڵەندا لە هەولێر كرد، كە كۆڵۆنێڵ بارت كۆینبێرخ، فەرماندەی سەربازیی هاوپەیمانیی نێودەوڵەتیی راوێژكارانی هێزەكانی هۆڵەندا لە عیراق و هەرێمی كوردستان یاوەریان بوو.

بەگوێرەی راگەیەندراوێکی نوسینگەی راگەیاندنی جێگری سەرۆکی هەرێم لە كۆبوونەوەكەدا دوایین پەرەسەندن و پێشهاتە ئەمنی و سیاسییەكانی عیراق و هەرێم، بارودۆخی ئارامی و سەقامگیری ناوچەكە، هەماهەنگی و برەودانی زیاتر بە پەیوەندییە دیپلۆماسییەكانی نێوان وڵاتی هۆڵەندا و هەرێمی كوردستان، هەڵسەنگاندنی دۆخی سەربازیی و پڕۆسەی چاكسازی و یەكخستنەوەی پێشمەرگە و چەند پرسێكی جێی بایەخی هاوبەش، تاوتوێ كران.

شێخ جەعفەر شێخ مستەفا جێگری سەرۆكی هەرێمی كوردستان لە كۆبوونەوەكەدا جەختی لە بەردەوامبوونی پەیوەندییەكانی نێوان هەرێمی كوردستان و هۆڵەندا كردەوە، هەروەها گفتووگۆكانی نێوان لایەنە سیاسییەكانی عیراق و هەرێمی بە پێویست زانی لەپێناو دۆخی هەستیاری ناوچەكە و چارەسەركردنی كێشەكان لە چوارچێوەی دەستوور و پاراستنی بەرژەوەندییە باڵاكانی دەوڵەت، دواتر سەبارەت بە پڕۆسەی چاكسازی و یەكخستنەوەی پێشمەرگەش لە چوارچێوەی وەزارەتی كاروباری پێشمەرگەدا، تیشكی خستە سەر هەنگاوەكانی ئەو پڕۆسەیە و خێراكردنی ئەو میكانیزمانەی كە گرنگە بۆ خزمەتكردنی پڕۆسەی یەكخستنەوەكە.

لای خۆیانەوە وەفدی میوان، دووپاتیان كردەوە كە بەردەوام دەبن لە هاریكاری و برەودان بە پەیوەندییەكانیان لەگەڵ هەرێمی كوردستان، هەروەها یارمەتیدەر دەبن بۆ چارەسەركردنی كێشەكان و پاراستنی سەقامگیری لە عیراق و هەرێم، پاشان رۆڵی هەرێمی كوردستان و پێشمەرگەیان لە بەرەنگاربوونەوە و تێكشاندنی داعش بەرز نرخاند و هیوایان خواست گفتووگۆكانی نێوان بەغدا و هەولێر ببێتە هۆكارێك بۆ چارەسەركردنی كێشەكان و جێگیربوونی سەقامگیریی دۆخی ئەمنی و سیاسی و ئابووری.