پێکهاتەکانی هەرێم دوای بریارەکەی دادگای فیدڕاڵی داوایەک له‌ مەسعود بارزانی دەکەن

23:45 2024-02-21 30890 كوردستان 0

2024-02-21

30890

پێکهاتەکانی هەرێمی کوردستان دوای بڕیارەکەی دادگای فیدڕاڵی بە لابردنی١١ کورسی کەمینەکانداوایەکیان ئاراستەی مەسعود بارزانی سەرۆکی پارتی دیموکراتی کوردستان کرد کە ئه‌م نادادپه‌روه‌رییه‌ی دادگای فیدراڵی ره‌تبكاته‌وه‌

له‌ كۆنفرانسی رۆژنامه‌وانی پێكهاته‌كانی كوردستان لەهەولێر دوای بڕیاره‌كانی دادگای فیدراڵی به‌ڕێوه‌چوو, محه‌ممه‌د ئیلخانی به‌ نوێنه‌رایه‌تی پێكهاته‌كان رایگه‌یاند، ئه‌وه‌ی ئه‌مڕۆ له‌ دادگای فیدراڵی به‌ڕێوه‌چوو، ته‌نیا بڕیارێكی سیاسی ئاشكرا بوو، بۆ به‌رژه‌وه‌ندی لایه‌نێكی سیاسی دیاریكراو كه‌ له‌ هه‌ڵبژاردنه‌كانی پێشوو تووشی لاوازی بووه‌.
ئیلخانی راشیگه‌یاند، وه‌ك پارت و لایه‌نه‌كانی پێكهاته‌كانی كوردستان (توركمان، كلدان، ئاشووری، سریان و ئه‌رمه‌ن) داوا له‌ سه‌رۆك بارازنی ده‌كه‌ین وه‌ك داكۆكیكاری مافی مرۆڤ و پێكهاته‌كان،‌ ئه‌م نادادپه‌روه‌رییه‌ ره‌تبكاته‌وه‌.

گوتیشی، ئێمه‌ له‌ سیاسه‌ت و ستراتیژیمان پاشگه‌ز نابینه‌وه‌، له‌ خه‌بات و دیپلۆماسییه‌ت به‌رده‌وام ده‌بین.

هه‌ر له‌ كۆنفرانسه‌ رۆژنامه‌وانییه‌كه‌، مونا قه‌هوه‌چی جێگری سەرۆکی پارتی چاکسازی تورکمان رایگه‌یاند، له‌ هه‌نگاوه‌كانی خۆمان پاشگه‌ز نابینه‌وه‌ و به‌رده‌وام ده‌بین.

قه‌هوه‌چی راشیگه‌یاند، ئێمه‌ باوه‌ڕمان به‌ پێكه‌وه‌ ژیان‌ و پرۆسه‌ی دیموكراسییه‌، بڕیاره‌كه‌ی دادگای فیدرالی پاشگه‌زبوونه‌ له‌ پرۆسه‌ی دیموكراسی.

گوتیشی، بڕیاره‌كه‌ی دادگای فیدراڵی پێچه‌وانه‌ی ده‌ستووری عێراقه‌.

له‌لایه‌ن خۆشییه‌وه‌ ئانۆ جه‌وهه‌ر سەرۆکی هاوپەیمانی حامۆرابی له‌و كۆنفرانسه‌ رۆژنامه‌وانییه‌ رایگه‌یاند، ته‌واوی پێكهاته‌كانی كوردستان سه‌ركۆنه‌ی بڕیاره‌كانی دادگای فیدراڵییان له‌ میانه‌ی كۆبوونه‌وه‌یه‌ك كرد.

گوتیشی: بڕیاره‌كه‌ی دادگای فیدراڵی كوده‌تایه‌ به‌سه‌ر ده‌ستووری عێراق.

باسی له‌وه‌شكرد، ئه‌و سته‌مه‌ به‌هۆی سكاڵایه‌كه‌وه‌ له‌ پێكهاته‌كان كرا، كه‌ له‌لایه‌ن یه‌كێتی نیشتمانی كوردستان ئاراسته‌ی دادگای فیدراڵی كرابوو.

ئه‌وه‌شی خسته‌ڕوو، به‌هۆی ئه‌و سكاڵایه‌وه‌ پێشێلكارییه‌كی زۆر گه‌وره‌ ده‌رهه‌ق به‌ مافه‌كانی پێكهاته‌ نه‌ته‌وه‌یی و ئایینییه‌كان له‌هه‌رێمی كوردستان كراوه‌.