ڕێگری کرا لە یادی تیرۆرکردنی ڕۆژنامەنووس وەدات حوسێن لە شاری دهۆک

14:25 2024-08-14 77622 كوردستان 0

2024-08-14

77622

لە هەرێمی کوردستان چالاكی ساڵیادی تیرۆركردنی ڕۆژنامەنووس وەدات حسێن بەڕێوەچوو و ‏لە دهۆك هێزە ئەمنییەكان ڕێگرییان كرد و ڕۆژنامەنووسێكیان دەستگیر كرد.‏
لە شاری سلێمانی بە بەشداریی دەیان کەس، مەراسیمێک بۆ هەشتەمین ساڵیادی ‏تیرۆركردنی وەدات حسێن بەڕێوەچوو، تێیدا بەیاننامەی بنەماڵەی ئەو ڕۆژنامەنووسە و ئاژانسی ڕۆژنیوز كە ‏وەدات كاری تێدا دەكرد خوێندرایەوە.
لە لەندەنی پایتەختی بەریتانیاش ژمارەیەک لە ڕۆژنامەنووس و ‏چالاكوان چالاكییەكیان بەو بۆنەیەوە ئەنجامدا
بەڵام ئێوارەی دوێنی ژمارەیەک لە چالاکوان و ڕۆژنامەنووسان هەوڵیان دا چالاكییەک لەسەر گۆڕی ئەو ‏ڕۆژنامەنووسە ئەنجام بدەن، بەڵام وەکو ساڵانی ڕابردوو لەلایەن هێزە ئەمنییەكانی دهۆكەوە ڕێگرییان ‏لێكرا‎.‎
هێزە ئەمنییەكانی دهۆک ڕۆژنامەنووس (ئومێد بەرۆشكی)یان دەستبەسەر كرد كە هەوڵی دەدا چالاكییەک ‏بۆ ئەو ساڵیادە ڕێكبخات، پاش چەند كاتژمێرێک ئازاد كرا.‏
كەسوكاری ئەو ڕۆژنامەنووسە دەڵێن: وەدات لە شەقامێكی قەرەباڵغی دهۆک و بە ئاشكرا ڕفێندراوە، بەڵام تا ‏ئێستا تۆمەتباران دەستگیر نەكراون، ئەمەش هیچ گومانێک ناهێڵێتەوە كە ئەم تیرۆرە لەلایەن دەسەڵاتەوە یان ‏لەژێر چاودێریی ئەواندا ئەنجام دراوە..
ئاژانسی ڕۆژنیوزیش ڕاستەخۆ پارتی دیموكراتی كوردستان بە تیرۆركردنی وەدات حسێن تۆمەتبار دەكات و ‏دەشڵێت: "دادگای دهۆک لە پاش هەشت ساڵ، لە بەرانبەر تیرۆرێكی ئاشكرا و بە ڕۆژی ڕووناك، لەگەڵ هەبوونی ‏دەیان بەڵگە و دەلیل، هێشتا پەیڤێكی نوێی لەبارەی كەیسی تیرۆركردنی شەهید وەدات حسێنەوە نەدركاندووە، ‏بكوژانی دەستگیرنەكراون و كەیسەكەشی لەلایەن هێزە ئەمنییەكانەوە داخراوە.‏
ڕۆژنامەنووس وەدات حسێن، پەیامنێری ئاژانسی ڕۆژنیوز، لە ڕۆژی 13ـی ئابی 2016 لە ناوشاری دهۆک ‏لەلایەن چەند چەكدارێكەوە ڕفێندرا و بە ئەشكەنجەدانەوە كوژرا‎.‎